Vindafjord kommune skal ta stilling til val av tomt for eit nytt, samlokalisert omsorgssenter.
Bakgrunnen er store strukturelle utfordringar i helse- og omsorgstenestene, som følgje av ei rask aldring av befolkninga, aukande behov for tenester og samtidig mangel på kvalifisert arbeidskraft.
Dagens drift ved Ølen omsorgssenter og Vindafjordtunet er krevjande med høg bruk av overtid, sjukefråvær og vakanse, særleg blant sjukepleiarar.
Framskrivingar
Framskrivingar viser at behovet for pleie- og omsorgstenester vil auke kraftig fram mot 2040, samstundes som det ikkje er realistisk å dekke dette med auka bemanning aleine.
Dagens tenestestruktur, med høg dekning på institusjonsplassar og høge kostnader per plass, er ikkje berekraftig over tid.
Det er difor nødvendig med ei omstilling der ein i større grad legg til rette for heimebaserte tenester, førebygging og at fleire kan bu lengre i eigen bustad.
For å møte desse utfordringane er det allereie politisk vedteke at heildøgns omsorgsplassar skal samlokaliserast.
Samlokalisering
Samlokalisering er vurdert som eit sentralt tiltak for å oppnå meir effektiv drift, betre ressursutnytting, styrka fagmiljø og betre rekruttering.
Samstundes ligg det klare regionale føringar om at slike funksjonar bør lokaliserast i kommunesenteret.
Saka legg fram fleire alternative løysingar for lokalisering og utbygging, mellom anna ombygging/utviding av eksisterande institusjonar og etablering av eit nytt omsorgssenter på ny tomt.
Alternativa har ulike konsekvensar knytt til kostnad, drift, kvalitet, rekruttering, utvikling av kommunesenteret og mogleg framtidig fleksibilitet.
Dei viktigaste utfordringane som må løysast gjennom vedtaket er:
- korleis kommunen skal sikre berekraftige helse- og omsorgstenester med færre personalressursar
- korleis ein best tilpassar kapasitet og tenesteprofil til framtidige behov
- korleis ein skal handtere store investeringskostnader og samtidig redusere langsiktige driftskostnader
- korleis lokalisering påverkar rekruttering, fagmiljø, tilgjenge for pårørande og samfunnsutvikling
- korleis løysinga kan støtte ei nødvendig omstilling mot meir heimebaserte tenester og betre bustadstruktur
Det politiske handlingsrommet i saka ligg i hovudsak i:
- val mellom nybygg eller vidareutvikling av eksisterande institusjonar
- val av lokalisering, med avveging mellom regionale føringar, utvikling av Ølen som kommunesenter og omsyn til heile kommunen
- prioritering mellom investeringsnivå, økonomisk risiko og framtidig driftsgevinst
- grad av ambisjon for omstilling av tenestene og kor sterkt ein vil vri ressursbruken frå institusjon til heimetenester og bustadutvikling
Val av tomt er eit strategisk vegval som vil få store konsekvensar for både tenestetilbod, kommuneøkonomi og samfunnsutvikling i lang tid framover. Saka gir grunnlag for å vurdere kva løysing som best balanserer omsynet til kvalitet, berekraft, økonomi og utvikling av Vindafjord-samfunnet.
Kommunedirektøren har følgjande overordna konklusjon:
Dei samla analysane peikar tydeleg i same retning. Deler av dagens bygningsmasse, særleg ved Vindafjordtunet, er lite eigna for framtidig drift og bør delvis rivast. Samstundes krev den demografiske utviklinga ei omstilling der ein reduserer bruken av institusjonsplassar og styrkjer heimebaserte tenester og omsorgsbustader.
Samlokalisering av institusjonsplassar i eitt moderne bygg framstår som avgjerande for å sikre kvalitet, effektiv drift og betre rekruttering. Lokalisering i Ølen gir klart best resultat på faglege, sosiale, økonomiske og rekrutteringsmessige kriterium.
Sjølv om nybyggalternativet har høgast investeringskostnad, gir det lågast kostnader over tid og best grunnlag for berekraftig drift. På denne bakgrunnen blir det tilrådd at Vindafjord kommune etablerer eit nytt, samlokalisert omsorgssenter i Ølen (alternativ 3).