Jobb i Vindafjord kommune

Det å jobba i kommunen er å jobba for og med folk. Me yt tenester til kundar i alle delar av livet, frå vogge til grav. Uansett om ein jobbar med små stjerner i barnehagen, ungdommar på ungdomskulen som står overfor val om framtida, menneske som har vore på flukt frå sine heimland, eldre og sjuke som treng omsorg, forvaltning av ulike lovverk, eller reinhald og drift av alle våre bygg – så er ein jobb i kommunen ein meiningsfull jobb. Alle tilsette i Vindafjord kommune er ei viktig brikke for å yta viktige tenester til våre innbyggarar.

Tilsette i Vindafjord kommune er omfatta av ein tariffavtale som er inngått med arbeidstakarorganisasjonane. Hovudtariffavtalen regulerer lønns- og arbeidsvilkår for arbeidstakarar i kommunen. Gjennom hovudtariffavtalen har ein gode ordningar blant anna når det gjeld ytingar i samband med sjukdom og fødsel, dødsfall/gruppeliv og yrkesskade/yrkessjukdom.

Offentleg tenestepensjon er ei pakke med både livsvarig alderspensjon, AFP, uførepensjon og etterlattepensjon. Denne pensjonen kjem i tillegg til pensjon/yting gjennom folketrygda (NAV). Den offentlege tenestepensjonen er ei trygg og sikker ordning. Tilsette i Vindafjord kommune har offentleg tenestepensjon i KLP. Lærarane i Vindafjord kommune har offentleg tenestepensjon i Statens Pensjonskasse (SPK).

Tilsette i Vindafjord kommune er dekka etter arbeidsgivar sin yrkesskadeforsikring, gruppelivsforsikring og ulukkesforsikring i tråd med hovudtariffavtalen. Når arbeidstakar er på tenestereise, gjeld reiseforsikring.

Vindafjord kommune jobbar for ein heiltidskultur, det vil sei at me jobbar for at dei som ønsker og kan jobba fulltid, skal få jobba fulltid. Deltidstilsette skal få moglegheit til utvida stilling ved ledig stilling som ein er kvalifisert for. Både lov- og avtaleverk gir oss som arbeidsgivar føringar for heiltidsarbeidet, i tillegg har Vindafjord kommune eigne reglement og godt samarbeid med tillitsvaldapparatet.

Som tilsett i Vindafjord kommune har moglegheiter for fleksible arbeidstidsordningar. Innan helse og omsorg nyttar ein nå i hovudsak kalenderplan. På omsorgssentra har ein gode moglegheiter til å kunne påverka eigen turnus, for eksempel om ein ønsker å gå langvakter. Tilsette som ikkje jobbar etter ein arbeidsplan eller turnus, har fleksibel arbeidstid i tråd med kommunen sitt reglement.

Vindafjord kommune har for tida ein eigen modell for helgetillegg som gjeld for alle i turnus som går over eit visst antall helgetimar i løpet av eit kalenderår. Denne trappetrinnsmodellen ser slik ut:

• Opp til 289 helgetimar: 70 kroner
• Frå 290 til 349 helgetimar: 100 kroner
• Frå 350 helgetimar: 150 kroner

Fast tilsette i Vindafjord kommune som tek utdanning på minst 15 studiepoeng kan ha rett til stipend dersom utdanninga er godkjent av arbeidsgivar og den tilsette ikkje får støtte via andre ordningar. Utdanning som førar fram til fagbrev kan også gi rett til stipend.

Tilsette som tar ei relevant vidareutdanning som leiar på førehand har sagt at det er trong for, kan få kompetansetillegg. I Vindafjord kommune sin lønspolitiske plan regulerer kven som er omfatta av ordninga og beløpet på kompetansetillegget.

For studentar i relevante studieprogram som jobbar i Vindafjord kommune under studietida, føl eit eige reglement for lønsfastsetting. Studentar som har vore vikar/fast tilsett i minimum to år av studiet og/eller har arbeida i kommunen i alle sommarferiane i studiet, vert etter endt utdanning lønast med kr. 5000 over den til eikvar tid tid gjeldande minstelønnstabell for høgskuleutdanna, når dei i tillegg går i stilling i kommunen som dei er utdanna til.

• Bedriftskunstlag – Alle fast tilsette i Vindafjord kommune kan melda seg inn i bedriftskunstlaget. Føremålet for bedriftskunstlaget er å stimulera kunstinteressa mellom dei tilsette i kommunen ved forskjellige tiltak – mellom anna å kjøpa inn kunstverk som vert tildelt medlemmene etter loddtrekning.
• KORe' Vindafjord – Alle tilsette i Vindafjord kan vera med i KORe' Vindafjord. Sjå meir informasjon om koret på nettsidenen.
• Rabatt på treningssenter – Alle tilsette får rabatt på trening ved Frisk Treningssenter i Ølen. Les meir om treningssenteret på deira nettsider.
• Tilbod om gunstig mobilabonnement – Alle tilsette kan nytta seg av kommunen sin innkjøpsavtale med Phonero/Telia, som gir mobilabonnement til ein gunstig pris.